Në janar të 2021, Ministrja e Kulturës Elva Margariti deklaroi se do të punohej për ndriçimin e 15 kalave në të gjithë Shqipërinë. Asaj kohe ajo tha se është në proces diskutimi me donatorët për ngritjen e fondeve, ndërsa në listën e investimeve 2021-2023 në Kuvend nuk rezultojnë projekte dhe fonde të alokuara për zbatimin e projektit të ndriçimit të 15 kalave. “Falë projektit të rikualifikimit të monumenteve të kulturës do të ndriçohen 15 kala në të gjithë Shqipërinë, duke kthyer krenarinë e harruar”, deklaroi ministrja. Por, deri më sot, që bëhen dy vjet nga ky premtim i Margariti vetëm 5 kala ndriçohen pjesërisht dhe ato janë investime te bizneseve aty brenda, por asnjë ndërhyrje nga shtetit.
Teksa ka bërë 2 vjet vetëm fjalë dhe premtime, Margariti u kujtua sot në mes të krizës për energji që të nisë punimet për ndriçim dhe rregullim vetëm në 2 prej 15 kalave të premtuara. Dhe këtu janë në lojë shumë lekë! Me urdhër të ministres, me datë 10 tetor, Fondi Shqiptar i Zhvillimit ka njoftuar se do të vërë në dispozicion 3 miliardë lekë për të siguruar ndriçimin në kalanë e Durrësit dhe Lezhës.
Bëhet fjalë për tenderin me numër reference REF-44146-10-01-2022 dhe objektiv “Ndërhyrje në zona historike për forcimin e potecialit turistik, kala, ura, qendra historike, pazare, fasada, etj (rajoni 1 dhe 2) – Restaurimi i urës së mesit, Ndriçimi kalave Durrës, Lezhë”. Gara është e hapur deri me datë 18 dhjetor dhe më pas do të nisin punimet.
Margaritit iu deshën 2 vjet që të mbante fjalën e saj, por sikur duket edhe kjo lëvizje vjen pas ankesave dhe denoncimeve në media. Gjithsesi duhet të theksojmë se ky tender merr përsipër ndriçimin vetëm në kalanë e Lezhës dhe Durrësit, ndërsa vendimi i qeverisë 29 dhjetorit 2020 thotë se brenda këtij harku kohor duhej të ishin mbuluar me ndriçim; Kalaja e Boshtovës, Borshit, Elbasanit, Durrësit, Himarës, Kaninës, Kalja në Kepin e Rodonit, Kalaja e Lezhës, e Petrelës, Peqinit, Libohovës, Palermos, Prezës, Shurdhahut dhe kalaja e Tiranës. 
Pjesa më e madhe e këtyre kalave si ajo e Lezhës, e Shurdhaut, Kalaja e Prezës, Kalaja e Palermos e të tjera janë në terr total, nuk kanë asnjë llambë që i ndriçon. Kanë pjesërisht ndriçim Kalaja e Elbasanit, e Durrësit, e Himarës dhe Tiranës, që më së shumti janë ndriçime nga bizneset që operojnë aty. Për këtë sezon që kaloi turistët i vizituan në terren këto pika të mrekullueshme historike, shpresojmë që sezonin e ardhshëm ministrja ta ketë përmbushur premtimin e saj.
Kalaja Palermos 2022:
Kalaja Lezhës 2022:
Esmeralda Hida
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post