Kryetari i Partisë së Lirisë, Ilir Meta ka shpalosur disa nga pikat e platformës së tyre që do të zbatojnë për sektorin e shëndetësisë nëse vijnë në pushtet.
Në një tryezë për shëndetësinë, Meta theksoi se të moshuarit nuk do të paguajnë asnjë lekë për ilaçe, pasi të gjitha do të rimbursohen.
Ai u zotua se qendrat shëndetësore dhe ambulancat do të jenë shumë pranë qendrave të banuara, për t’ju ardhur në ndihmë qytetarëve.
Nga ana tjetër Meta foli dhe për dyfishim të pagave për mjekët dhe infermierët.
“Është e pabesueshme dhe e papranueshme, por Tirana sot, megjithëse me një popullsi 7 herë më të madhe, ka thuajse të njëjtin numër Qendrash Shëndetësore dhe Poliklinikash si para viteve 90, kur kryeqyteti nuk kishte më shumë se 165 mijë banorë.
Ndërkohë që jepen qindra mijëra metra katrorë për kulla pafund, nxirren njerëzit me dhunë nga shtëpitë, që në banesat e tyre të ndërtohen sërish kulla, nuk ndërtohen Qendra Shëndetësore të Reja, ndërkohë që ka njësi Administrative të Tiranës që kanë 10-fishuar popullsinë e tyre.
Disa ditë më parë kam marrë angazhimin publik, që me ardhjen në pushtet, të gjithë pensionistët e Shqipërisë nuk do të paguajnë asnjë lek, për barnat, që u duhen atyre për shëndetin dhe që mjekët ua rekomandojnë nëpërmjet recetës.
Nuk mund të kuptohet sistemi shëndetësor pa mjekë dhe infermierë të paguar në mënyrë dinjitoze. Pikërisht për këtë arsye kaq të rëndësishme, ne angazhohemi për rritje 50% e menjëhershme e pagës së mjekëve, specialistëve dhe infermierëve me synimin e dyfishimit të pagave në shëndetësi.
Kjo rritje është plotësisht e mundshme dhe do te mund të jetë edhe më e madhe, pasi mundësitë financiare janë të gjitha, por kjo eshte penguar deri tani sepse xhepat gjigand të oligarkëve dhe të qeverisë, përpijnë miliarda Euro.
Discussion about this post