Një lojtar i NBA, Çens Komançi, u arrestua nga policia pasi dyshohet për vrasjen e një 23-vjeçareje. Bashkë me lojtarin u arrestua edhe e dashura e tij, pasi dyshohet se rrëmbyen dhe vranë 23-vjeçare, në rrethana që ende nuk janë zbardhur.
Basketbollisti 27-vjeçar i Stokton Kings, ekipi i dytë i Sakramento Kings që merr pjesë në G-League, u arrestua dy ditë pas të dashurës së tij 19-vjeçare.
Sakari Harnden, dyshohet se ka hartuar planin për të vrarë 23-vjeçaren Marajna Roxhers.
Policia kishte nisur hetimet pasi ishte sinjalizuar se Roxhers ishte zhdukur dhe kërkimet kishin sjellë në përfundimin se basketbollisti dhe e dashura e tij kishin qenë personat e fundit që ishin parë me të.
Pasi morën në pyetje Harnden, ata më pas nisën kërkimet për trupin dhe autoritetet lokale kanë konfirmuar se është gjetur kufoma e personit të humbur në një zonë të shkretuar në Nevada.
Menjëherë më pas u lëshua urdhër-arresti për basketbollistin.
Komançi ka qenë pjesë e skuadrave të NBA që nga viti 2017 kur u zgjodh në draft nga Memfis, por gjithmonë duke luajtur me skuadrat e G-League, teksa një sezon ka luajtur edhe në basketbollin turk me Ankara DSI.
Discussion about this post