Pas lirimit të Endrit Dokles, policia e Tiranës ka liruar nga qelia edhe Fatjon Muratin me Gentjan Reçin, ndonëse ky i fundit ishte një nga të dyshuarit kryesorë për vrasjen e të shumëkërkuarit Ervis Martianj.
Gjithashtu, Fatjon Murati ishte shpallur në kërkim nga Prokuroria e Kurbinit pasi emri i tij doli në hetimet pas masakrës së Fushë Krujës, ku mbetën të vrarë tre persona, Brilant Martinaj, Besmir Hoxha dhe Diklen Vata.
Nga ana tjetër, vetë Dokle u mor në pyetje nga policia pak javë më parë pas dyshimeve të familjarëve të shumëkërkuarit Ervis Martinaj në lidhje me zhdukjen e djalit të tyre.
Kjo pasi emri i Martinajt u nxor nga i penduari i Drejtësisë Nuredin Dumani i cili tha se kishte marrë një porosi nga “Mbreti” i lojërave të fatit për eleminuar Doklen kundrejt një pagese prej 500 mijë eurosh.
Dokle mohoi të ketë gisht në zhdukjen e Martinajt i cili rezulton i zhdukur prej datës 10 Gusht. Ndërkohë Dokle, i cili ishte një ndër të të shoqëruarit nga policia mbrëmjen e djeshme kishte ndryshuar pamjen, kishte lënë mjekër dhe nuk është njohur fillimisht nga uniformat blu, por pas verifikimeve ka rezultuar se është ai.
Prej disa ditësh policia ka nisur kontrolle të shumta në disa qytete për kapjen e personave të shpallur në kërkim dhe zbardhjen e ngjarjeve të ndryshme kriminale.
Discussion about this post