Shqiptari i dyshuar për vrasjen e bashkëatdhetares së tij në Itali Anila Ruçi, ka dalë nga spitali ku qëndronte prej ditësh. Shëndeti i 31-vjeçarit Osman Bilyhu është përmirësuar dhe ai është dërguar në burgun e Torre del Gallo.
31-vjeçari u gjet me plagë të rënda në bark dhe kraharor më 19 Prill. Para autoriteteve ai tha se i kishte marrë plagët nga një sulm me thikë nga një person i panjohur, gjatë së cilit u vra gruaja ndërsa ai u plagos.
Por kjo dëshmi mbeti e pabesueshme për hetuesit derisa kuptuan se plagët në trupin e tij ishin shkaktuar nga vetë ai. Në këtë rezultat doli ekspertiza e mjekëve.
Po ashtu, u morën nën shqyrtim kamerat e sigurisë të cilat nuk filmuan asnjë person tjetër që të hynte apo të dilte nga shtëpia e tyre. Këto për hetuesit përbëjnë incidie të rënda faji kundër tij dhe ka ende shumë rrethana për të sqaruar. Deri më tani nuk dihet ende shkaku se pse e kreu vrasjen.
Në momentin kur u zbulua vrasja, ai u prezantua si vëllai i saj, por u vërtetua se mes tyre nuk ka pasur asnjë lidhje familjare, e se në fakt ai ishte partneri i saj. Fillimisht ngjarja u raportua sikur brenda banesës së tyre hynë disa persona të panjohur, rreth orës 5:00 të mëngjesit dhe i sulmuan me thikë. Bilyhu iku në spital, ndërsa bashkëjetuesen e la në shtëpi pa njoftuar askënd. Alarmin për vrasjen e ngriti estetistja e fshatit me të cilën Anila Ruçi kishte lënë takim. Ajo kishte tentuar ta kontaktonte pasi nuk i ishte përgjigjur dhe karabinierët mbërritën në shtëpinë e saj, ku e gjetën të vdekur. Megjithatë arma e krimit nuk është gjetur ende.
Discussion about this post