Sekretari i Përgjithshëm i Partisë Demokratike Gazment Bardhi i ka hedhur poshtë akuzat që janë raportuar në disa media se ai ka komunikime telefonike me Suel Çelën, i njohur si “i forti i Elbasanit”.
Në një konferencë me gazetarët, Bardhi tha se nuk ka asnjë lidhje me Suel Çelën, 30-vjeçarin që është akuzuar për tentativë vrasje të efektivëve të policisë së Elbasanit, incident i ndodhur në tregun agro-ushqimor të Elbasanit më 18 shtator të vitit 2017.
“Madje më kanë akuzuar se unë flas në telefon me Suel Çelën. Ai e di shumë mirë që unë nuk flas në telefon me Suel Çelën. E kam pas përballë në 25 prill. Sot ky individi që e kemi pasur përballë në zgjedhjet e 25 prillit thërret drejtues të PD në Elbasan dhe i vendos përpara formularin për nënshkrim.
E di edhe Flamur Noka se ka qenë para dy ditësh i thirrur nga ata që kanë besuar tek demokratizimi i PD, për këtë çështje se nuk të pranojnë demokratët e Elbasanit që t’ia mbledhë Kuvendin Kombëtar të PD Suel Çela, nuk e pranojnë kurrë” – tha Bardhi.
Ndërkohë Gazment Bardhi, ka denoncuar përsëri ditën e sotme se në “Foltoret” e organizuara nga Sali Berisha, pjesë në mbledhjen së firmave është edhe shefi i shtabit elektoral të deputetit socialist Orlando Rakipit, në zgjedhjet e 25 prillit.
Discussion about this post