Brisilda Sadushi është 23-vjeçarja e cila humbi jetën më 23 shtator 2021 në spitalin e Vlorës gjatë një ndërhyrje kirurgjikale. Që prej asaj date, asnjë përfaqësues i spitalit nuk ka reaguar për ngjarjen e rëndë, ku humbi jetën nëna e dy fëmijëve.
Burimet nga Spitali Rajonal i Vlorës, ditën e ngjarjes bënin me dije se viktima ka pasur probleme për shkak të një infeksioni në zorrë, i cili më pas u përhap në gjithë trupin. Sipas burimeve në momentet e ndërhyrjes kirurgjikale, ajo ka qenë në gjendje shoku.
“Do ta ndjek këtë ngjarje deri në fund”, kështu është shprehur babai i Brisilda Sadushit ditën e sotme në lidhje me ngjarjen tronditëse.
Tashmë, 2 javë pas ngjarjes ka reaguar dhe i ati i 23-vjeçares i cili tregon dhe momentin kur u njoftua për lajmin e rëndë. Sipas Ardian Lekës, e bija nuk ishte ankuar asnjëherë për probleme shëndetësore e se ajo jetonte me bashkëshortin e saj.
Ndër të tjera, Leka shprehet se ka kërkuar të takojë mjekun i cili ndodhej në sallë në momentin e operacionit, por nuk ka marrë asnjë përgjigje deri më tani.
23-vjeçarja Sadushi la pas 2 fëmijët e mitur
