Njëri nga dy vëllezërit Luka që dhunuan kuzhinierin e njohur Indrit Çela ka treguar më shumë detaje rreth ngjarjes. Ernest Luka ka pranuar para policisë se ai sëbashku me të vëllain e rrahën Indritin, pasi pak kohë më parë ky i fundit dhe kunati i tij kishin parakaluar me makinë dy autorët. Që në atë kohë ata patën një konflikt dhe dy vëllezërit i nxorën inatin Indritit në momentin që e kapën atë vetëm në befasi. Madje autori tha se nuk pendohet, por do ta kishin katandisur më keq kuzhinierin nëse nuk do kishin ndërhyrë kalimtarët.
“Po e pranoj. Unë dhe im vëlla e rrahëm Indritin. E rrahëm se kishin një konflikt të hapur me të dhe me kunatin e tij, me të cilin disa muaj më parë u përplasëm fizikisht për shkak të një parakalimi makine. Sapo e pamë se Indriti ishte duke lëvizur me makinë, iu afruam dhe i bllokuam rrugën dhe më pas e rrahëm. Për fatin e tij të mirë ndërhynë disa udhëtarë të tjerë që u ndodhën në ato momente në vendin e ngjarjes”, ka deklaruar mes të tjerash 24-vjeçari, i cili u vu në pranga disa orë pas ngjarjes pas një operacioni antidrogë në shtëpinë e tij.
Pas ngjarjes së ditës së shtunë dhe identifikimit të autorëve të ngjarjes, policia zbarkoi në banesën e dy vëllezërve në Derven për arrestimin e tyre lidhur me rrahjen dhe gjatë kontrolleve hasën në një shtëpi bari të instaluar nga dy vëllezërit dhe babai i tyre.
Discussion about this post