Pushimet në këto javë të fundit të muajit gusht kanë përfunduar në tragjedi për tre persona.E diela ka shënuar një bilanc tragjik në bregdetin shqiptar, ku dy pushues nga Maqedonia e Veriut u mbytën në plazhin e Spillesë në Kavajë dhe një pushues tjetër nga Kosova në plazhin e Velipojës.
Mirko Micevski, 79 vje ç dhe Cvetko Mitanovski, 78 vjeç pushues nga Maqedonia e Veriut ishin futur në ujë për t’u larë, por deti ka qenë i trazuar me dallgë dhe për pasojë të moshuarit nuk kanë mundur të dalin në breg. Vrojtuesit e plazhit nuk kanë mundur të shohin të moshuarit për shkak të dallgëve të shumta.
Në një prononcim për Gijotina.com Gent Lasku, Sekretari i Përgjithshëm i Federatës Shqiptare të “Vrojtuesit të Plazhit dhe Shpëtimit në Ujë” tha:
“Është e konfirmuar se janë dy viktima dhe jo tre siç u raportua në fillim. Nga të dhënat tona të dy personat kanë qenë duke notuar, nga ku mendohet se njëri prej tyre ka pësuar atak kardiak, ndërsa personi tjetër në tentativë për t’a shpëtuar mendohet të jetë mbytur.”
Ndërkohë, Lasku u bëri thirrje instanacave përkatëse të marrin masa menjëherë, për sigurimin e rojeve bregdetare në plazhet shqiptare.
“Është skandaloze, që bashkia paguan 300 mln lekë për stolat dhe nuk paguan trajtimin e rojeve të plazhit, i cili kushton 300 mijë lekë të vjetra, e për rrjedhojë do të ketë viktima. Policia bashkiake qëndron aty duke larguar pleqtë të cilët shesin fiq, por nuk ka policë që të ruajnë plazhet. Plazhet private janë një hap para plazheve publike, pasi kanë rojet bregdetare, ndërkohë që duhet të jetë e kundërta ne t’u japim shembulll atyre. Këtë punë e ka në dorë shteti”.
Dy viktimat janë nxjerrë me skaf, ndërkohë që policia ka kryer procedurat dhe i kanë dërguar në morgun e spitalit të Durrësit.
Gjithashtu, në Velipojë është mbytur në det pushuesi 59-vjeçar, Hasan Hysenaj nga Kosova.
Edhe në plazhin e Velipojës mungojnë rojet bregdetare, një problem ky që nuk po gjen zgjidhje prej vitesh edhe pse thirrjet apo edhe protestat e pushuesve kanë qenë të shumta.
