Mirgit Vataj, drejtues i linjës kombëtare për fëmijë, “Alo 116/111”, se në muajt e fundit janë shtuar rastet e ngacmimit të fëmijëve në internet. Ai tha gjatë një interviste televizive që, më shumë se 150 raste të situatave të pakëndshme ndaj fëmijëve në internet, janë raportuar veç në periudhën janar-tetor të këtij viti.
“Çështjet e sigurisë online të fëmijëve janë çështje më së shumti të raportuara te numri 116/111. Vitet e fundit ka filluar të rritet numri i raportimeve. Nga janari deri në fund të muajit tetor, në numrin e telefonit, por edhe në platformën online, kemi marrë më shumë se 150 raste ku fëmijët kanë raportuar një lloj situate të pakëndshme që ata kanë hasur. Këtu ka ndikuar edhe pandemia, pasi shumicën e aktiviteteve fëmijët po e bëjnë online”, tha ai.
Po ashtu ai u shpreh se grabitqarët seksualë po e përdorin internetin për të rekrutuar viktimat e tyre, ndërsa theksoi se prindërit nuk e perceptojnë rrezikun.
“Në Shqipëri ka një problem shumë të madh. Prindërit, pavarësisht se mundohet të plotësojnë kërkesat e fëmijëve për të qenë në kontakt, për ta pasur akses në internet, në të njëjtën kohë kanë shumë pak informacion për aktivitetet online të fëmijëve. Fëmijët e konsiderojnë të mbrojtur. Prindërit nuk e perceptojnë rrezikun”, u shpreh ai, ndërsa bëri thirrje që prindërit të jenë më të kujdesshëm.
Discussion about this post