Vrasja e Madrit Ulqinakut për një “pse më pe..?” në Elbasan, arrestohet autori (EMRA)

Është arrestuar autori i vrasjes së Madrit Ulqinakut në Elbasan, ngjarje e ndodhur vetëm pak ditë më parë.

Bëhet fjalë për 18- vjeçarin Horgito Peqini, ndërsa policia bën me dije se është shoqëruar edhe një person i identifikuar me emrin Klaudjan Sallufi 33 vjeç që ishte bashkë me autorin e vrasjes.

Po punohet për sqarimin e rrethanave duke bashkëpunuar me Prokurorinë e Rrethit Gjyqësor Elbasan. Policia njofton se: Sa të mbarojnë veprimet  do keni komunikatë të plotë.

Si ndodhi ngjarja

33-vjeçari, Madrit Ulqinaku, babai i një vajze mbeti i vdekur në vend pasi u qëllua me armë zjarri pasi doli nga lokali ku po pinte kafe, në afërsi të bulevardit kryesor të qytetit. Dyshohet se autori është ndihmuar nga persona të tjerë për t’u larguar, ndërsa policia ka sekuestruar edhe kamerat e sigurisë në zonë.

Pas ngjarjes së rëndë, familjarët e 33-vjeçarit, kanë shpërthyer në britma e ulërima, teksa kanë mbërritur në vendin ku u vra Madrit Ulqinaku. ‘Kush e vrau… para 10 minutash fola me çunin? A është ai apo jo? Kush e vrau?’– dëgjohen ato teksa ulërasin me të qara dhe tentojnë që t’i afrohen trupit të pajetë por ndalohen nga policia.

Kjo nuk është tragjedia e parë për familjen Ulqinaku. Nga trazirat e 1997 iu vra një djalë tjetër, vëllai i Madrit Ulqinakut.