Zbardhen detaje të reja nga atentati me tre të vrarë që ndodhi ditën e djeshme NË Fushë Krujë. Burime për gijotina.com bëjnë me dije se është gjetur një tjetër makinë e djegur në zonën e Bubqit. Policia dhe grupet hetimore po hetojnë për të zbuluar nëse mjeti është përfshirë në atentat nga autorët.
Pritet të zbardhen detaje pas këqyrjes së mjetit të shkrumbuar në Bubq.
FNSH dhe RENEA vijojnë kontrollet në disa zona të Fushë Krujës ku dyshohet se përdoren si strehë për fshehjen e bashkëpunëtorëve në atentatin me tre të vrarë ditën e djeshme.
Theksojmë se nga raportimet e gijotina.com dhe hetimet e deritanishme, 4 janë autorët që dyshohet se kanë marrë pjesë në atentatin mafioz ku u ekzekutuan Brilant Martinaj, Dilen Vata dhe Arbër Hoxha. Ata kanë vëzhguar dhe më pas ndjekur viktimat teksa udhëtonin me makinë, dhe kanë hapur zjarr ndaj tyre, në një moment kur në këtë aks rrugor nuk kishte lëvizshmëri të automjeteve të tjera.
Sipas informacioneve autorët zbrazën rreth 80 plumba mbi makinën që ndodheshin viktimat.
Pasi kryen me sukses ekzekutimin e tyre, autorët janë larguar në drejtim të paditur ndërsa makina që dyshohet se është përdorur për të kryer krimin, u gjet e djegur pak kilometra larg vendit të ngjarjes, në fshatin Larushk.
Brenda makinës u gjetën 3 armë, ndërsa në vendin e ngjarjes u gjetën rreth 80 gëzhoja.
Atentati ka qenë i mirëorganizuar pasi policia nuk ka ende asnjë gjurmë të tyre, edhe pas këqyrjes paraprake të kamerave të sigurisë që ndodheshin përreth vendit ku u krye ekzekutimi i trefishtë.
Discussion about this post