Mbi 12 orë pasi u deklarua se Alqi Bllako ishte arratisur dhe nuk gjendej në polici, Drejtoria e Përgjithshme e Policisë së Shtetit ka deklaruar se ish-deputeti socialist Alqi Bllako është dorëzuar në polici.
Në një deklaratë zyrtare, policia informon se ish deputeti ndodhet në Drejtorinë e Policisë që prej mbrëmjes së djeshme, duke u vetëdorëzuar konform me ligjin.
Duhet thënë se ky njoftim i policisë vjen 12 orë me vonesë, pas lajmeve që qarkulluan në media se Bllako mund të ishte arratisur, ku ndonëse në reagim thuhet se është vetëdorëzuar, nuk dihet nëse ky veprim është kryer para apo pas daljes së informacionit se ai nuk është gjetur në banesë.
Arratisja e Bllakos do kishte vënë në pozitë shumë të vështirë policinë, e cila kishte deklaruar më herët se e kishte shoqëruar në komisariat, por e vërteta rezulton se ai është dorëzuar vetëm në orët e vona të natës, pasi nuk u gjet gjatë kontrollit në banesë.
Bllako, akuzohet për “Shpërdorim të detyrës” në bashkëpunim dhe “Korrupsion pasiv i funksionarëve të lartë shtetërorë”. Sipas Prokurorisë së posaçme ai, në bashkëpunim me ish Ministrin e Mjedisit Lefter Koka dhe një tjetër zyrtar të Ministrisë, ku ai ka patur detyrën e Sekretarit të Përgjithshëm, kanë përgatitur dokumentacion të falsifikuar në lidhje me të dhënat e pronës së shpronësuar, për ndërtimin e inceneratorit të Fierit, duke ndryshuar cilësimin nga “arë” në “tokë truall”, duke rritur vlerën e shpronësimit.
Po ashtu ai dyshohet se ka favorizuar shoqërinë përfituese të koncensionit, në këmbim “të përfitimeve të parregullta” me një vlerë prej afro 150 mijë dollarë, të cilat kanë shkuar në formën e pagesave të larta mujore për babanë e tij, i punësuar pranë inceneratorit të Tiranës.
Discussion about this post