“Drejtësi për Jonadën”, protestuesit zhvendosen drejt Kryeministrisë

Pasi ndezën disa qirinj në homazhe për vogëlushen e ndjerë Jonada Avdia, në dyert e Ministrisë së Brendshme, protesta është zhvendosur drejt Kryeministrisë.

Me thirrjet “Çuçi ik, hiqni kapelet”, pak momente më parë, qytetarët u përplasën me kordonin policor të vendosur para Ministrisë së Brendshme.

Protesta “ Nuk e vrau varka, por shteti” është organizuar nga shoqëria civile pas vrasjes së vogëlushes Jonada Avdia nga polici Arjon Tase, i cili po drejtonte një mjet lundrues tip skaf në bregdetin e Potasit.

Vogëlushja po kalonte pushimet së bashku me familjen në Himarë në momentin e tragjedisë kur u godit për vdekje nga skafi “vrasës” i drejtuar nga polici Tase.

Protestuesit kërkojnë dorëheqjen e ministrit të Brendshëm, Bledi Çuçi, ministres së Turizmit, Mirela Kumbaro dhe kryepolicit, Gledis Nano.