Christiane Hohmann është emëruar kryetare e Delegacionit të BE-së në Shqipëri, duke zëvendësuar në këtë detyrë Luigi Soreca-n. Ajo është aktualisht ambasadore e Gjermanisë në Estoni dhe më parë ka shërbyer si ambasadore gjermane në Bosnje dhe Hercegovinë.
Emërimin e ka firmosur kryediplomati evropian, Josep Borrell, i cili caktoi 31 kryetarë të rinj të delegacioneve të BE-së. Marrja zyrtare e mandatit bëhet ndërkaq pas marrjes së marrëveshjeve përkatëse nga vendet pritëse.
Hohmann do të jetë ambasadorja e re e BE në Shqipëri, duke zëvendësuar kështu Luigi Sorecan, i cili e mbajti detyrën prej vitit 2019 deri në vitin 2022.
Hohmann është një emër i njohur në diplomacinë gjermane. Ajo ka përfunduar fillimisht studimet për anglisht dhe frëngjisht në Berlin në vitin 1988. Nga viti 1988 deri në 1991 ajo ishte studente hulumtuese për letërsinë angleze në Universitetin Humboldt në Berlin dhe më pas përfundoi shërbimin përgatitor për shërbimin e lartë të jashtëm midis 1991 dhe 1993.
Punën e parë në këtë rang e filloi në Ministrinë e Jashtme Federale në Berlin. Në vitin 2005, ajo filloi punë si zyrtare shkëmbimi në Komisionin Evropian në Bruksel dhe e mbajti detyrën deri në vitin 2010. Në vitin 2016, Hohmann mori postin e parë si diplomate gjermane, duke u caktuar si ambasadore e Gjermanisë në Bosnjë dhe Hercegovinë. Në korrik të vitit 2019, pasi mbaroi mandatin në Bosnjë dhe Hercegovinë, u caktua si ambasadore në Estoni. Tashmë, me mbarimin e mandatit në Estoni, ajo caktohet si përfaqësuese e BE-së në Shqipëri.
Discussion about this post