Komiteti Teknik i Ekspertëve ka dalë në një konferencë për mediat ku ka njoftuar heqjen e të gjithë masave anti-covid që ishin në fuqi, duke u rikthyer në normalitetin para pandemisë.
Zëvendës ministrja e Shëndetësisë, Mira Rakacolli në fjalën e saj ka bërë me dije se do të hiqet mbajtja e maskës me detyrim dhe do të lejohet muzika pas orës 23:00.
“Duke u nisur nga analiza e treguesve epidemiologjik, komiteti ka vendosur rekomandimin për vaksinimin me dozë të katërt mbi 60 vjeç dhe me sistem imunitar të inkrupementuar. Heqjen e detyrimit për mbajtjen e maskave në ambientet e mbyllura dhe në vendet e pa ajrosura. Lejimin e muzikës pas orës 23:00 dhe rihapjen e klubeve të natës. Virusi është akoma prezent ndaj është e rëndësishme që qytetarët të jenë vigjilent dhe të ndjekin këshillat për vaksinimin ndaj Covid 19″, ka thënë ajo.
Gjithashtu, Komiteti vendosi heqjen e detyrimit për paraqitjen e certifikatës së vaksinimit në kufi, duke lejuar lëvizjen e lire të njerëzve në prag të sezonit turistik.
“Heqjen e detyrimit për të paraqitur dokument vaksinimi për SARS-COV 2, dokument të testimit negativ për SARS-COV 2, apo certifikatë të shërimit nga ky infeksion, për të gjithë shtetasit që hyjnë në Shqipëri nga çdo pikë kufitare duke filluar nga data 1 maj e këtij viti. Komiteti i Ekspertëve do monitorojë situatën dhe këto masa do vlerësohen në dinamikë. Do ndryshojnë sipas nivelit të riskut”, tha Rakacolli.
Pas dy vitesh pandemi dhe nën masa të rrepta, më në fund situata në vend i është rikthyer normalitetit, ndërsa rastet e Covid janë thuajse të papërfillshme.
Discussion about this post