Në përgjigje të propozimit të KLGJ, Presidenti Ilir Meta ka emëruar Darjel Sinën si anëtarin më të fundit të Gjykatës së Lartë, duke e çuar numrin e trupës në 12.
Në qëndrim e tij, Meta shprehet se është e papranueshme që KLGJ i ka zvarritur më shumë se dy vite e gjysmë plotësimin e vakancave në Gjykatën e Lartë duke mos marrë në konsideratë as deklaratat e tij për ndjekjen me prioritet të procedurave.
“Plotësimi i kësaj vakance në Gjykatën e Lartë ka zgjatur ekzaktësisht 2 (dy) vjet e 7 (shtatë) muaj, (shtator 2019-prill 2022) ç’ka tregon se kohëzgjatja e procedurave të ndjekura nga KLGJ është e papranueshme, përtej çdo afati ligjor dhe të arsyeshëm. Edhe pse Presidenti i Republikës, zyrtarisht dhe përmes mesazheve publike ka kërkuar dhe ka bërë disa herë thirrje për ndjekjen me prioritet të procedurave të plotësimit të vakancave në Gjykatën e Lartë, sërisht faktet tregojnë se KLGJ dhe/apo institucionet e përfshira apo të lidhura me këtë proces kanë vepruar jashtë këtij prioriteti”, shkruhet në njoftim.
Me këtë emërim të ri, nga sot Gjykata e Lartë bëhet me 12 (dymbëdhjetë) gjyqtarë, nga 19 që kjo gjykatë duhet të ketë.
Discussion about this post