Pas arrestimit të ish-deputetit Alqi Bllako, socialisti Pandeli Majko ka pranuar të marrë mandatin e deputetit të lënë bosh dhe ka depozituar formularin e dekriminalizmit në KQZ.
KQZ pritet ta marrë në shqyrtim kërkesën e Majkos, i cili ndonëse nuk arriti të siguronte një karrige në parlament në zgjedhjet e 25 prillit, sërish arriti të futet në Kuvend.
Kujtojmë se, pas Bllakos në listë ishte Majko, dhe Kodi Zgjedhor parashikon se në momentin kur një deputet ose anëtar ndërpret mandatin, atëherë ky i fundit i kalon kandidatit që vijon në listën e së njëjtës parti në zonën zgjedhore përkatëse.
SPAK kërkoi që Kuvendi t’i hapte rrugë arrestimit të Bllakos, si i përfshirë në aferën e inceneratorit të Fierit, ku së bashku me ish-ministrin Lefter Koka ai ka favorizuar kompaninë për inceneratorin e Fierit dhe ka falsifikuar dokumentet për shpronësimin e tokës ku do ndërtohej impianti i trajtimit të mbetjeve.
Discussion about this post