Ish-deputeti socialist Alqi Bllako është vetëdorëzuar në polici pas kërkesës së SPAK për arrestimin e tij pasi rezulton i përfshirë në aferën e inceneratorëve. Një ditë pasi dorëzoi mandatin e deputetit, Bllako ka vendosur të vetëdorëzohet për tu gjykuar si qytetarët i thjeshtë para drejtësisë.
Dy ditë më parë SPAK kërkoi nga Kuvendi autorizimin për arrestimin e Bllakos, teksa të mërkurën pasdite ai dorëzoi mandatin e deputetit në Kuvend. Sot SPAK dërgoi në GJKKO kërkesën për arrestimin e Alqi Bllakos i dyshuar për korrupsion dhe shpërdorim detyre.
Sipas njoftimit të SPAK, Bllako akuzohet se ka bashkëpunuar me ish-ministrin e Mjedisit Lefter Koka për aferën e inceneratorët të Fierit, në kohën kur mbante pozicionin e Ish Sekretarin e Përgjithshëm të Mjedisit.
Të dy bashkë akuzohet se kanë përgatitur dokumentacion të falsifikuar në lidhje me të dhënat e pronës së shpronësuar, duke paraqitur dhe propozuar pranë Këshillit të Ministrave projektvendimin dhe relacionin për shpronësim për kategorinë e pronës “tokë truall”, ndërkohë që rezulton e provuar se prona është “tokë arë”.
Nga hetimet e kryera kanë rezultuar të dhëna se nga ana Bllako, gjatë kohës që ka shërbyer në fillim me funksionin Sekretar i Përgjithshëm i Ministrisë së Mjedisit dhe më pas Drejtor i Përgjithshëm i Agjencisë Kombëtare të Ujësjellës Kanalizimeve dhe Infrastrukturës së Mbetjeve (AKUM), është favorizuar shoqëria koncesionare “Integrated Technology Waste Treatment Fier” sh.p.k., kundrejt marrjes në mënyrë të tërthortë të përfitimit të parregullt në shumën prej 14,964,900 (katërmbëdhjetë milion e nëntëqind e gjashtëdhjetë e katër mijë e nëntëqind) lekë.
Gjithashtu, Bllako është akuzuar nga opozita se babi i tij ka përfituar rrogë 10 milionë lekë të vjetra në muaj , pasi ishte i përfshirë në aferën e inceneratorëve. SPAK bën me dije se është vënë nën sekuestro apartamenti në Tiranë që rezulton të jetë në pronësi të Edmond Bllakos, babait të deputetit.
Discussion about this post