Dy djemtë e ish deputetit Tom Doshi janë shpallur në kërkim nga policia, pasi akuzohen se kanë dhunuar dhe kundërshtuar punonjësit e policisë. Ngjarja ka ndodhur një natë më parë, ku fillimisht policia dha vetëm inicialet e tyre, por më vonë u zbulua se ata janë fëmijët e ish deputetit, konkretisht Marcos dhe James Doshi.
“Specialistët për Hetimin e Krimeve në Komisariatin e Policisë Nr. 2 bënë arrestimin në flagrancë të shtetasit E. L., 34 vjeç, banues në Tiranë, për veprat penale “Goditja për shkak të detyrës”, “Plagosja e lehtë me dashje” dhe “Prishja e qetësisë publike”. Gjithashtu, shpallën në kërkim për veprat penale “Plagosja e rëndë me dashje”, “Goditja për shkak të detyrës”, “Kundërshtimi i punonjësit të Policisë së rendit publik”, “Mosbindja ndaj urdhrit të punonjësit të Policisë së rendit publik” dhe “Prishja e qetësisë publike”, të kryera në bashkëpunim, shtetasit M. D., 20 vjeç dhe J. D., 22 vjeç, të dy banues në Tiranë”, deklaroi fillimisht policia, duke shpjeguar këta 3 shtetas, gjatë një konflikti për motive të dobëta, në rrugën “Ismail Qemali”, kanë goditur me sende të forta shtetasin R. S., 38 vjeç, dhe më pas nuk i janë bindur urdhrave të punonjësve të Policisë, për të ndaluar, por i kanë kundërshtuar ata, duke i goditur për shkak të detyrës. “Shtetasi E. L. është vënë në pranga, ndërsa Marcos Doshi dhe James Doshi janë larguar. Vijon puna për kapjen e tyre“, njofton policia.
Discussion about this post