Një grua 75-vjeçare në Tokio është arrestuar nga policia japoneze, pasi pranoi se kishte ruajtur për 20 vjet trupin e vajzës së saj në një frigorifer.
Gruaja shkoi vetë në polici, e shoqëruar nga një anëtar i familjes, dhe deklaroi se kishte mbajtur trupin e së bijës, e lindur në vitin 1975, brenda një frigoriferi në banesën e saj.
Sipas zëdhënësit të policisë, oficerët gjetën trupin e një gruaje në një gjendje të avancuar dekompozimi, të mbështjellë dhe të veshur me një bluzë dhe të brendshme. Trupi ndodhej brenda një frigoriferi në shtëpinë e saj në verilindje të Tokios.
Në deklarimet e saj, gruaja është shprehur: “Njëzet vjet më parë, era e trupit mbushi të gjithë shtëpinë, kështu që bleva një frigorifer dhe e vendosa atje”. Ajo po hetohet për akuzën e braktisjes së trupit të një të ndjeri.
Policia do të kryejë një autopsi për të përcaktuar shkakun e vdekjes. Mësohet se 75-vjeçarja ka pasur edhe fëmijë të tjerë dhe ka jetuar e vetme prej disa javësh, që pas ndarjes nga jeta të bashkëshortit.
Discussion about this post