Një grua e moshuar në Tiranë, u sulmua dje nga dy qenë pitbullë. E moshuara u transportua me urgjencë në spital pasi kishte marrë plagë të rënda.
Mësohet se në momentin që është sulmuar, e moshuara ka bërtitur dhe banorët e tjerë të pallatit kanë ndërhyrë për ta ndihmuar që të largohet.
Sipas mjekëve 66-vjeçarja me iniciale B.B., fatmirësisht është jashtë rrezikut për jetën, kjo falë ndërhyrjes së shpejtë të njerëzve.
Pasi u dërgua te spitali i Traumës, është lajmëruar Policia dhe është bërë e mundur të sqarohen rrethanat e ngjarjes ku bëhet me dije se i zoti i dy qenve kërcënues është një banor i të njëjtit pallat.
Policia me të marrë njoftimin e ka kuptuar se për kë bëhet fjalë, pasi personi ishte paralajmëruar edhe shumë herë të tjera në lidhje me rrezikshmërinë që i paraqitej komunitetit nga dy qentë e racës së dhunshme. Ai është vënë në pranga nga Policia dhe ka dhënë shpjegimet e para në lidhje me ngjarjen, duke u shfaqur i habitur se si dy qentë e tij kishin mundur të dilnin nga banesa.
Ai i ka thënë Policisë se e kishte lënë derën e mbyllur dhe madje për siguri edhe derën tjetër të drurit që e ndan me pjesën tjetër të katit të vet, por qentë në fakt kanë rezultuar të lirë dhe me dyer të hapura. Policia ka mundur të dokumentojë edhe dëshminë e gruas në spital, e cila i ka thënë Policisë se qentë e fqinjit të saj kanë qenë gjithnjë kërcënim për banorët.
Discussion about this post