Është shtyrë ditën e sotme seanca mes deputetes së PD, Jorida Tabaku dhe kryetarit të Bashkisë së Tiranës, Erion Veliaj, pasi ky i fundit nuk është paraqitur në Gjykatë.
Tabaku e ka paditur Veliajn për shpifje, pasi sipas saj, gjatë zgjedhjeve të 25 prillit, ai ka thënë disa të pavërteta për deputeten e PD.
“Unë e kuptoj që politika e ditës hedh shumë baltë, hedh shumë akuza, hedh shumë fjalë por në fund të ditës politika duhet te ketë moralin. Sa herë që ti shpif për një kundërshtar, sa herë që ti akuzon një kundërshtar, sa herë që ti gënjen për një kundërshtar, ti duhet të përballësh me të. Gjatë fushatës elektorale z.Veliaj bëri disa akuza ndaj personit tim, të pavërteta, të cilat unë ia lë në dorë sistemit të drejtësisë që t’i vërtetojë. Për të qenë edhe pak biblik këtë të hënë të mëngjesit, “kush rron nga shpata, nga shpata do të vdesë, kush rron me shpifje, nga shpifja do e pësojë”.
Tabaku u shpreh e sigurt se gjykata do të marrë një vendim të dejtë për çështjen, edhe para njerëzve që presionojnë mediat apo rrethojnë gjykatat sipas saj.
“Unë ia lë në dorë sistemit të ri të drejtësisë, është një sprovë edhe për ata që të japin rezultatin edhe para njerëzve të pushtetshëm me para’, edhe përpara njerëzve që presionojnë mediat, që rrethojnë gjykatat, të japin një vendim të drejtë. Jam e sigurt që do të ketë një vendim të drejtë”, tha Tabaku.
Kujtojmë se, para disa ditësh Veliaj nuk u paraqit as në seancën e pajtimit me deputeten Grida Duma, ku kjo e fundit e akuzoi për shpifje, pasi ai e quajti trafikante apartamentesh.
