Një ngjarje e pazakontë ka ndodhur në Indi, kur një burrë që u shpall i vdekur pas një aksidenti me motoçikletë dhe u vendos në ngrirësen e morgut, ka shokuar familjarët kur panë se po merrte frymë mëngjesin tjetër.
45-vjeçari Srikesh Kumar, ishte në gjendje kritike kur u godit nga motoçikleta të shtunën në Moradabad, në lindje të kryeqytetit New Delhi, ndërsa u shpall i vdekur kur mbërriti në spital dhe u dërgua në morg.
“Mjeku i emergjencës e ekzaminoi. Ai nuk zbuloi shenja jete prandaj e shpalli të vdekur”, tha për AFP, zyrtari i spitalit Rajendra Kumar.
Trupi i tij u vendos më pas në ngrirësen e morgut derisa të afërmit erdhën rreth gjashtë orë më vonë.
“Kur policia me familjarët erdhën për identifikimin dhe autopsinë, burri ishte gjallë. Kjo është plotësisht një mrekulli,” tha ai, duke shtuar se gjithsesi burri mbetet në gjendje kome.
Kreu i spitalit Dr. Shiv Singh tha se mjeku i urgjencës e kishte ekzaminuar pacientin në orën 3 të mëngjesit dhe ai nuk kishte rrahje zemre. Më pas ai u shpall i vdekur, por në mëngjes policia dhe familjarët e gjetën atë të gjallë.
Mësohet se, një hetim ka nisur për mjekun dhe spitalin në fjalë.
Discussion about this post