Një episod i pazakontë ka ndodhur sot në bashkinë Kukës, pasi Drejtori i Kabinetit të Bashkisë Kukës, Granit Gjana, i shoqëruar nga dy persona ka shkuar në ambientet e shkollës në Kodër Lumë, për të kundërshtuar një kronikë të një medieje lokale, që sipas tij, ka shumë të pavërteta brenda.
Kamera fokusoi xhamat e thyer të dritareve të kësaj shkolle, dyert e çara që dukeshin sikur do të binin nga momenti në moment, duke rrëzuar kështu propagandën e Bashkisë së Kukësit, të drejtuar nga Safet Gjici.
Gjana u fut brenda klasave dhe shpjegoi se dy klasa ishin për momentin të përdorshme për mësimet plotësuese që kanë nisur të frekuentohen nga nxënësit që nga fillimi i muajit shtator dhe që i kishin të gjitha kushtet. Me këto fjalë, Gjana nënkuptonte se klasat e tjera që kishin mangësi nuk janë të përdorshme.
“Përshëndetje siç e shikoni sot jemi në një shkollë në Kodër Lumë. Nisur nga një kronikë e medias lokale e cila ka shumë të pavërteta brenda. I kërkoj medias që të jetë më e përgjegjshme në kronikat që bëjnë. Të dyja klasat e përdorshme i kanë të gjitha kushtet. Në Bashkinë e Kukësit ka përfunduar lyerja e të gjitha shkollave, është bërë edhe procedura e prokurorimit për dezifektimin e këtyre shkollave, herë pas here. Të vini ta shikoni vetë dhe jo të bëni kronikë nga rruga. Ejani dhe shikojeni vetë këtë ambient që frekuentohet nga këta nxënës, aq sa ka sepse gjithmonë varet nga numri i nxënësve,”- tha Gjana.
Dimri është përpara dhe Kukësi është një qytet që njihet për mbizotërimin nga temperaturat e ulëta e reshjet e ftohta të dëborës. Viti i ri shkollor nuk është larg dhe ditët e mbetura nuk janë të mjaftueshme për ta bërë këtë shkollë me dyer e dritare të reja për të gjitha klasat, në mënyrë që nxënësit që do ta frekuentojnë të jenë të sigurt.
