Kosova do të luajë më 15 nëntor në transfertë ndaj Sllovenisë, në një ndeshje që mund t’i sigurojë vendin në fazën “play-off” të Botërorit 2026.
“Dardanëve” do t’u mjaftonte edhe një barazim për të arritur objektivin. Situata para sfidës ka sjellë edhe një rast të pazakontë për Federatën Sllovene të Futbollit, e cila është detyruar të pezullojë përkohësisht shitjen e biletave. Shkak janë bërë kërkesat e shumta nga tifozët e Kosovës për të ndjekur ndeshjen nga shkallët e stadiumit.
Autoritetet vendase kanë sqaruar se për blerjen e biletave në sektorin e mysafirëve duhet kontaktuar Federata e Futbollit të Kosovës. Gjithashtu, është bërë e ditur se në pjesët e tjera të stadiumit nuk do të lejohet hyrja me simbole të përfaqësueses kosovare.
Menaxhimi i mëtejshëm i biletave do të kryhet nga FFK-ja, ndërsa raportimet flasin se tifozët kosovarë kanë siguruar tashmë një numër të konsiderueshëm vendesh.
Discussion about this post