E pëson shqiptari në Itali! Gruaja e denoncoi për dhunë, policia i gjen në banesë kokainë dhe mijëra euro

Një 40-vjeçar shqiptar është arrestuar nga policia italiane për trafik droge, ndërsa nëna e tij është proceduar në gjendje të lirë.

Sipas mediave italiane, shqiptari i cili ka rezultuar pa precedentë të mëparshëm penal, ka rënë në pranga pas një denoncimi të bërë nga gruaja e tij për dhunë në familje. Ai akuzohet për posedim të lëndëve narkotike me qëllim trafikim, përndjekje, posedim pa leje të municionit dhe dhunë në familje.

Mësohet se policia bastisi banesën e 40-vjeçarit me iniciale K.G., pasi morën denoncimin se gruaja e tij, shtetasja me iniciale K. E., 37 vjeçe, ishte larguar nga shtëpia pas një debati me të shoqin.

Gjatë operacionit është shoqëruar në polici edhe nëna e 40-vjeçarit, shqiptarja me iniciale K. H., 59 vjeçe, pensioniste dhe banuese në të njëjtin qytet, për bashkëpunim në tregtimin e drogës. Ajo mësohet se është proceduar në gjendje të lirë.

Menjëherë policia ushtroi kontroll në banesë dhe u gjetën 3 pako kokainë me peshë 3,264 kilogramë, 13 mijë euro cash, që mendohet se ishin të ardhura të paligjshme, si dhe 52 gëzhoja të kalibrave të ndryshëm.

I dyshuari kur pa efektivët, u përpoq të fshihte lëndën narkotike, por pa sukses.

Gruaja e tij u gjet me shenja në fytyrë dhe trup nga dhuna fizike në urgjencën e Spitalit Civil të Noventa Vicentina, ndërsa shqiptari u izolua në Burgun e Vicenza, në pritje të procesit hetimor dhe gjyqësor.