Një masakër mund të konsiderohet përplasja mes fiseve pasditen e sotme në Klos, ku u vranë me armë zjarri në qendër të qytetit babë e bir, Liri dhe Kenado Shira, ndërsa mbetën të plagosur dy persona. Gjatë një deklarate për shtyp, kryepolici i Dibrës, Dhimitraq Ziu ka dhënë detaje të reja mbi ngjarjen duke shpjeguar se 3 autorët e dyshuar janë kapur, ku njëri prej tyre është vetëvrarë, konkretisht Fiqiri Mjeshtri.
Të plagosur kanë mbetur Renato Hasula dhe Englatin Hasula, të arrestuar janë Fatmir dhe Besnik Mjeshtri, ndërsa i dyshuari tjetër i përfshirë, Fiqiri Mjeshtri është vetëvrarë.
Shkaku i konfliktit nuk dihet ende, ndërsa paraprakisht policia dyshon se viktimat kanë qenë rastësore pasi objektivi i autorit kanë qenë Eglantin Hasula dhe Renato Hasula, edhe këta babë e bir. Të dy ata janë të plagosur dhe fillimisht u trajtuan në spitalin e Burrelit dhe sëfundmi janë nisur për në Tiranë.
Pak minuta pas vrasjes së dyfishtë, autori i dyshuar i vrasjes, Fiqiri Mjeshtri, në pamundësi për t’i ikur policisë ka drejtuar armën nga vetja dhe vetëvrarë. Ndërkohë, policia e Klosit ka shoqëruar në ambientet e saj dy persona Besnik Mjeshtri dhe Fatmir Mjeshtrin. Në një deklaratë për mediat, kreu i Policisë së Dibrës tha se policia është duke punuar për të zbuluar shkaqet e konfliktit që çuan në një bilanc tragjik si ky i sotmi.
Ai sqaroi se menjëherë pasi vrau dy personat në mes të Klosit, Fiqiri Mjeshtri është larguar për t’i shpëtuar policisë, por më pas ka qëlluar në drejtim të vetes duke humbur jetën në vend. Ngjarja ka tronditur banorët e Klosit, të cilët kanë vënë duart në kokë pasi kanë parë vrasjen në mes të rrugës së babë e bir.
Discussion about this post