Pasditja e së premtes mund të cilësohet si e zezë, ndërsa 6 persona kanë humbur jetën në ujë. Të 3 ngjarjet me 6 humbje jetësh njerëzore kanë ndodhur brenda pak orësh në Durrës, Tale (Lezhë) dhe Liqenin e Banjës në Gramsh.
Ngjarja më e rëndë është ajo që ka ndodhur në Liqenin e Banjës ku 4 persona, babai me dy djemtë, dhe kushëriri i tyre, humbën jetën.
Viktimat të moshës nga 14 në 46 vjeç, sipas të dhënave nga Policia, ishin futur për tu larë në Liqenin e Banjës, ku edhe humbën jetën në rrethana që ende nuk janë zbardhur.
Ngjarja ka ndodhur në fshatin Drizë të Gramshit, ku dyshohet se shtetasit A.Z, rreth 46 vjeç, R.Z, 19 vjeç, E.Z, 14 vjeç , (babai me dy djemtë) dhe kushëriri i tyre shtetasi M.Z, 20 vjeç, sipas deklarimeve të familjarëve janë futur në liqen për tu larë dhe nuk kanë dalë më.
Ndërkohë që RENEA ka shkuar në ndihmë të policisë lokale për të kërkuar për trupat e pajetë të 4 viktimave.
Por në orët e pasdites dy pushues kanë humbur jetën në bregdet, njëri në Durrës dhe tjetri në Tale të Lezhës.
Të dy pushuesit të moshës 52 dhe 68 vjeç, sipas të dhënave paraprake nga Policia, kanë pësuar arrest kardiak sapo kanë prekur ujin.
Discussion about this post