Ajo ishte një puthje përrallore. Kryeministri Rama e puthi publikisht në ballë biznesmenin Pëllumb Salillari dhe efekti zgjat pa fund. Kompania e tij i fiton si me magji tenderët e rrugëve. Pas megaaferave në kryeqytet, “Salillari” i ka shtrinë tentakulat edhe në bashki të tjera të vendit.
Këtë herë kompania e njohur ka përfituar një tender nga Bashkia Mallakastër. Është fjala për zbatimin e projektit “Rikonstruksion i rrugëve në fshatrat Dukas, Visokë, Greshicë, Mollaj”. Edhe pse vitesh këto fshatra janë lënë në harresë dhe rrugët kanë dalë jashtë përdorimi, bashkia u kujtua në prag shtatori, kur fillojnë dhe shirat për të bërë rindërtimin. Me sa duket qëllimi i saj është t’i jepte një kontratë “Salillarit” për të ruajtur pazaret e kryeministrit, se sa meraku për rrugët që kanë izoluar banorët e këtyre zonave nga qyteti.
Kështu, bashkia nuk e ka pasur aspak problem të shpallte menjëherë fitues “Salillarin” te procedura tenderuese me fond limit 116,565,167 lekë të reja pa TVSH ose rreth 1.4 miliardë lekë të vjetra me TVSH. Kjo kontratë i është dhënë oligarkut edhe pse në garë kanë marrë pjesë 10 kompani, madje me oferta më të ulëta. Ndërsa kompania “Salillari” ka paraqitur ofertë me vlerë 107,668,350 lekë të reja pa TVSH ose rreth 1.3 miliardë lekë të vjetra me TVSH. Konkretisht, plot 4 kompani të tjera ka dhënë oferta shumë më të ulëta sesa fituesi, e megjithatë për habi janë skualifikuar. Madje diferenca më e thellë mes Salillarit dhe firmës me ofertën më të ulët shkon në rreth 300 milionë lekë të vjetra me TVSH.
Është operatori ekonomik “Shkëlqimi” i cili ka ofruar të kryej këto punime me vetëm 85 milionë lekë, operatori “Admir shpk” ka paraqitur ofertën 84 milionë lekë. Ndërkohë bashkimi i operatorëve “ ASI DHE 2A CO” ka paraqitur ofertën 102 milionë lekë, si dhe operatori “ Caushi” ka ofruar të bëjë këto punime me 94 milionë lekë. Por, sërish bashkia te çmimet më të kripura. Pse jo? Për aq kohë sa paguajnë qytetarët. Mbi të gjitha për shërbime që nuk i marrin.
Pra, në këtë tender ka abuzim të hapur, pasi ligji për prokurimet publike kërkon që të merren parasysh ofertat më ulëta. Por, Bashkia Mallakastër e ka pasur të vështirë me sa duket të skualifikojë Salillarin, pasi ky i fundit është mik i qeverisë dhe në këto kohë vendorët mundohen t’iu shmangen kritikave të Kryeministri. Dhe me sa duket që në mbledhjen e radhës Rama t’i përmend si bashki shembullore, kryetarët zgjedhin këtë rrugë, t’u plotësojnë qejfet miqve të Ramës.
Ndërkohë, këtu ka vend për dyshime nëse Salillari do të realizojë vërtet punimet në këto rrugë, pasi tashmë jemi mësuar që paratë i merret, por punën e lë përgjysmë. Madje kjo kompani, në disa raste ka ndërtuar rrugë e ura që janë rrëzuar më pas ose janë çarë në mes.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post