Një ngjarje e rëndë përdhunimi brenda familjes, e ndodhur një vit më parë në Vrellë të Istogut, e cila tani është bërë publike, ka tronditur opinionin publik në Kosovë. Sipas policisë së Kosovës, 39-vjeçari I.M akuzohet se në shtator të 2021 ka përdhunuar mbesën e tij, vajzën e vëllait, e cila është e mitur. Ngjarja është zbuluar pas denoncimit të së miturës e cila ka rrëfyer detajet e ngjarjes së rëndë të ndodhur në moshën 14-vjeçare.
Ndonëse ende nuk dihen detaje të sakta për rrethanat në të cilat ka ndodhur ngjarja, Prokurori i Shtetit ka urdhëruar arrestimin dhe ndalimin e tij. 39-vjeçari është prangosur dhe shoqëruar në stacion policor, por për shkak të gjendjes shëndetësore nuk është dërguar në Qendrën e Mbajtjes, por është nxjerrë aktvendim për ndalim prej 48 orësh, ku gjatë kësaj periudhe do të jetë nën përkujdesjen e Policisë teksa merr trajtim mjekësor në spital.
Sipas të njëjtave burime, rasti është nën hetim nga Prokurori i Shtetit si “Dhunim”, ndërsa pritet që veprimet e tjera të merren posa të sigurohen prova që dëshmojnë përfshirjen e të dyshuarit në këtë rast dhe më pas pritet të përcaktohet për veprën me të cilën do të ngarkohet i njëjti.
Rastet e përdhunimeve dhe të marrëdhënieve seksuale brenda familjes janë vepra të sanksionuara me Kodin Penal të Republikës së Kosovës. Kushdo që kryen akt seksual me paraardhës ose pasardhës të familjes, motra apo vëllezër, nipa apo mbesa dënohet me burgim.
Discussion about this post