Një 50-vjeçare, e shpallur në kërkim nga policia u vu në pranga ditën e sotme. I.T, banuese në Bullgari akuzohet se është pjesë e një grupi të strukturuar kriminal që ndihmojnë emigrantë të kalojnë kufirin në mënyrë të paligjshme kundrejt pagesës.
Shtetasja 50-vjeçare ishte gjetur fajtore nga Gjykata e Shkallës së Parë në Tiranë në vitin 2019 dhe iu caktua masa e sigurisë “Arrest me burg”. Nga grupi ku dhe ajo bënte pjesë, janë vënë në pranga dhe 3 pjesëtarë të tjerë, ndërsa po punohet për kapjen e 3 të tjerëve.
Njoftimi i Policisë:
Shkodër/Vijon operacioni “Sundimi i ligjit”, kapet një shtetase e shpallur në kërkim.
Kjo shtetase akuzohet si pjesëtare e një grupi të strukturuar kriminal që ndihmonte emigrantë, kundrejt pagesës, që të kalonin ilegalisht kufirin.
Si rezultat i kontrolleve të ushtruara në zbatim të megaoperacionit mbarëkombëtar “Sundimi i ligjit”, për kapjen e shtetasve në kërkim dhe goditjen e veprimtarive të ndryshme kriminale, bazuar dhe në informacionet e siguruara nga inteligjenca policore, nga specialistët e Seksionit për Hetimin e Trafiqeve të DVP Shkodër është kapur dhe ndaluar shtetasja bullgare:
I. T.(D.), 50 vjeçe, banuese në Bullgari.
Gjykata e Shkallës së Parë për Krimet e Rënda Tiranë, në vitin 2019, ka caktuar për këtë shtetase, masën e sigurisë “Arrest në burg”, për veprat penale “Ndihma për kalim të paligjshëm të kufijve”, kryer në bashkëpunim, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”, pasi dyshohet si pjesëtare e një grupi kriminal që ushtronte në mënyrë të organizuar, kundrejt pagesës, veprimtarinë e dhënies ndihmë emigrantëve, për kalim të paligjshëm të kufijve. 3 pjesëtarë të këtij grupi kriminal janë vënë në pranga, më parë, ndërsa po punohet për kapjen e 3 të tjerëve.
Materialet procedurale i kaluan Prokurorisë, për veprime të mëtejshme.
Discussion about this post