Ndërsa shumë prindër sakrifikojnë jetët e tyre për fëmijët, ka disa që vetëm prindër nuk mund të quhen. Rasti i 40 vjeçarit nga Cardiff në Angli, John Cole dhe të shoqes 31 vjeçare, Angarad Williamson, është tipik i dy monstrave. Ata vranë djalin e tyre pesë vjeçar pas muajsh të tërë torturave, e flakën në lumë dhe me pafytyrësi shpallën zhdukjen e të voglit dhe kërkuan ndihmë për ta gjetur.
Ngjarja ka tronditur opinionin publik dhe po gjykohet pasi u zbardh nga policia britanike. Vogëlushi që shikoni në foto, 5-vjeçari Logan Muangi, nuk jeton më. Mëngjesin e 31 korrikut 2021, trupi i djalit të vogël u gjet nga policia në një lumë vetëm 250 metra larg shtëpisë së tij në Bridget, 32 km në perëndim të Cardiff. Sipas mediave në Uells, 5-vjeçari vuajti prej muajsh nga torturat e babait dhe nënës së tij. Situata u përkeqësua më 20 korrik, kur fëmija rezultoi pozitiv me korona. Ai u mbajt mbyllur në dhomë, pa kujdes prindëror dhe mjekësor.
Punonjësit socialë kishin shkuar dy herë në shtëpinë e familjes, por nuk kanë vepruar në kohë për t’i shpëtuar jetën 5-vjeçarit pasi u penguan nga prindërit. Hetimi nxori se një vit para se fëmija të gjendej i vdekur, fëmija përfundoi me krah të thyer, por asnjë veprim penal nuk u ndërmor për prindërit. Kurse dy muaj para vdekjes, djali ishte djegur me ujë të nxehtë në qafë.
E gjatë gjithë këtyre muajve, çifti porosiste vakte të shtrenjta ushqimesh ndërsa detyronin të voglin të hante vetëm drithëra dhe madje e tallnin për ushqimin e shijshëm që ata hanin dhe ai jo. Babai trupmadh dhe shtatlartë i dha urdhër 5-vjeçarit të bënte ushtrime gjimnastikore derisa ai ishte rraskapitur dhe ra duke qarë në dysheme. I vogli u gjet në lumë, me plagë dhe mavijosje në të gjithë trupin e tij. Ekspertët dëshmuan në gjykatë se këto ishin shenja abuzimi që 5-vjeçari kishte pësuar muaj para se t’i merrnin jetën./Noa.al/
Discussion about this post