Kolegji Zgjedhor vendosi ripërsëritjen e zgjedhjeve në Bashkinë e Rrogozhinës, duke pranuar kërkesën e koalicionit “Bashkë Fitojmë”.
Rinumërimi i votave në Rrogozhinë nuk ndryshoi rezultatin, por ngushtoi diferencën mes kandidatëve Edion Memolla i PS dhe Shkëlqim Hoxha i “Bashkë Fitojmë”, të cilët përkatësisht në zgjedhjet e 14 majit kishin marrë 5129 dhe 5108 vota me një diferencë prej 21 votash.
Ndërkohë, “Bashkë Fitojmë” ka kërkuar më herët edhe pavlefshmëri të kutive të burgut të Rrogozhinës duke pretenduar shkelje serioze, përfshi këtu edhe lejimin për votim të të burgosurve që nuk kishin emrin në listën e votuesve të Bashkisë Rrogozhinë.
Pas vendimit të marrë nga Kolegji pritet që të ribëhen zgjedhjet në Bashkinë e Rrogozhinës, e cila përfshihet në qarkun Tiranë, nëse nuk do të ketë ankimim në Gjykatën e Apelit.
NJOFTIM PËR MEDIA
Pranë Gjykatës Administrative të Apelit Tiranë, për llogari të Kolegjit Zgjedhor Gjyqësor, është paraqitur për shqyrtim çështja Nr.31 Regj. Themeltar, Datë 09.06.2023 Regjistrimi, me:
ANKUES: Koalicioni ‘Bashkë Fitojmë’.
ANKUES: Person i tretë, kandidati për kryetar bashkie, Bashkia Rrogozhinë, z. Shkëlqim Hoxha.
KUNDËR: Vendimit nr.174, datë 06.06.2023 të Komisionit të Ankimimeve dhe Sanksioneve, KQZ.
Për dijeni, Komisioni i Ankimimeve dhe Sanksioneve (KAS), me Vendimin nr.174, datë 06. 06. 2023, objekt i ankimittë mësipërm, ka vendosur:
1. Pranimin e pjesshëm të kërkesës ankimore nr.80, datë 23.05.2023, të depozituar nga koalicioni ‘Bashkë Fitojmë’.
2. Ndryshimin e vendimit nr.531, datë 18.05.2023 të Komisionerit Shtetëror të Zgjedhjeve ‘Për miratimin e Tabelës Përmbledhëse të Rezultateve për zgjedhjen e Kryetarit të Bashkisë Rrogozhinë, në zgjedhjet për organet e qeverisjes vendore të datës 14 Maj 2023’, sipas tabelës përmbledhëse të miratuar me vendimin e ndërmjetëm të KAS të datës 05.06.2023. Data: 06.06.2023 Nr: 174 Ora: 12:15 ‘Për shqyrtimin e kërkesës ankimore nr.80, datë 23.05.2023 të depozituar nga koalicioni ‘Bashkë Fitojmë’’.
3. Rrëzimin e kërkesës për mospërfshirjen në Tabelën Përmbledhëse të Rezultateve për zgjedhjen e Kryetarit të Bashkisë Rrogozhinë, në zgjedhjet për organet e qeverisjes vendore të datës 14 Maj 2023, të rezultatit të zgjedhjeve për Qendrën e Votimit nr. 2224/01, IEVP Rrogozhinë.
Ky vendim hyn në fuqi menjëherë dhe publikohet në faqen zyrtare të Komisionit Qendror të Zgjedhjeve.
Bazuar në pikën 1 të nenit 145 të Kodit Zgjedhor, kundër këtij vendimi mund të bëhet ankim në Kolegjin Zgjedhor Gjyqësor pranë Gjykatës Administrative të Apelit, brenda 5 ditëve nga shpallja e tij, sipas përcaktimit të pikës 2 të nenit 152 të Kodit Zgjedhor’.
Më datë 12.06.2023 u hodh shorti publik për përcaktimin e përbërjes së Kolegjit Zgjedhor Gjyqësor dhe, sipas tij, trupi gjykues përbëhet nga gjyqtarët:
1. Esmeralda Xhili (Relatore);
2. Blerona Hasa (Anëtare);
3. Emona Muҫi (Anëtare);
4. Edlira Petri (Anëtare);
5. Marsela Dervishi (Anëtare).
Me Urdhër datë 13.06.2023 ‘Për caktimin e seancës gjyqësore’ të Kolegjit Zgjedhor Gjyqësor është caktuar data 15.06.2023, ora 15:00, për zhvillimin e seancës gjyqësore. Relatori i ҫështjes ka disponuar Vendimin datë 13.06.2023 ‘Për plotësimin e të metave të kërkesëpadisë’.
Lidhur me ambientin e zhvillimit të seancës gjyqësore, Kolegji Zgjedhor Gjyqësor caktoi Gjykatën Administrative të Apelit, në adresën Rr.’Ismail Qemali’, Njësia Bashkiake nr. 2, Tiranë, në kushtet kur prej njoftimeve të datave 12.06.2023 dhe 13.06.2023, në grupin e gazetarëve në aplikacionin WhatsApp, nuk pati asnjë konfirmim për pjesëmarrje në seancë, ҫka do të diktonte zhvillimin e seancës në ambientet e Këshillit të Lartë Gjyqësor.
Gjykata Administrative e Apelit Tiranë.
Discussion about this post