Vajza 6-vjeçare, e vetmja e mbijetuar nga tragjedia që goditi sot familjen Azizllari në Maliq, ka mbërritur në Qendrën Spitalore Universitare “Nënë Tereza” në Tiranë, ku është dërguar me urgjencë për shkak të djegieve të shumta në trup dhe gjendjes së rëndë shëndetësore.
Burime nga QSUT bëjnë me dije se e mitura po trajtohet në repartin e djegie-plastikës, ku i janë kryer ekzaminimet e para dhe po iu nënshtrohet analizave të thelluara nga ekipi mjekësor.
Në një prononcim për “News24”, xhaxhai i fëmijëve ka treguar se vajza ka mundur të dalë vetë nga shtëpia dhe ka shpëtuar falë ndihmës së fqinjëve.
“Vajza doli vet nga banesa. Ndihma e parë iu dha nga fqinjët tanë”, tha ai, ndërsa shoqëronte vajzën në QSUT.
Ngjarja e rëndë ndodhi paraditen e sotme në një lagje të Maliqit, ku një zjarr në banesën e familjes Azizllari i mori jetën nënës, Merjeme Azizllari (40 vjeç) dhe djalit 14-vjeçar, Luka.
Discussion about this post