Arjeta Cauli, nëna e dy fëmijëve e cila rezultonte e zhdukur në Durrës është gjetur ditën e sotme. 26-vjeçarja u gjet në Elbasan, në banesën e një personi që sipas saj është i fejuari.
Në dëshminë e saj në polici, gruaja është shprehur se vëllai i saj nuk kishte pse dilte në televizor për ta kërkuar pasi ka ikur me dëshirë nga shtëpia. Në fund, nëna e dy fëmijëve është shprehur se do të rikthehet sërish në banesën e të riut pasi e dashuron.
“Nuk i kisha thënë familjes së të dashurit që isha në proces divorci dhe kisha dy fëmijë. Do ja thosha në një moment të dytë. Vëllai s’kishte pse dilte në televizor. Unë me të s’kam pasur marrëdhënie të mira. Unë ika vetë, e dua shumë djalin me të cilin ika. Do shkoj prapë tek i fejuari në Labinot Katund. E dashuroj dhe nuk ndahem prej tij”, ka thënë ajo.
Nëna e dy fëmijëve rezultonte e zhdukur prej thuajse një jave. Ishte vëllai i saj që denoncoi zhdukjen e së motrës, e cila ishte nisur për në Pogradec pasi kishte procesin e divorcit. Sipas tij, dy ditë më vonë Aureta i kishte dërguar dy foto në Whatsapp që ishte në spital duke marrë serum dhe më pas kishte humbur kontaktet. Po ashtu, policia ka ushtruar kontrolle në banesën e ish-bashkëshortit të Arietës, i cili ka pohuar se nuk kishte lidhje me zhdukjen e saj. Mëngjesin e sotëm ajo është gjetur në Elbasan në gjendje të mirë shëndetësore dhe duke mohuar ta kishin rrëmbyer.
Discussion about this post