Endri Hasa, anëtar i Kryesisë së PD-së që drejtohet nga Lulzim Basha, është treguar mjaft i ashpër në qëndrim ndaj deputetëve demokratë që ishin prezent në tryezën e iniciuar nga Gazment Bardhi dhe ku ishte prezent edhe ish-Kryeministri Sali Berisha, që drejton Rithemelimin.
Megjithëse tryeza kishte për qëllim koordinimin e qëndrimeve të deputetëve të PD-së kundër Qeverisë Rama dhe Kryeministrit, Hasa në një intervistë për abcneës, ka përdorur shprehjen “udha e mbarë”, ndoshta duke paralajmëruar të tjera përjashtime nga partia e Bashës për ata ligjvënës që sipas tij, u takuan me Berishën.
“Udha e mbarë gjithkujt që do t’i bashkohet bunkerit anti-amerikan dhe kullës së madhe të korrupsionit që duan të ndërtojnë në Tiranë. Ne nuk i kemi bërë betejat për karriget por për demokratët. Ne kemi shprehur bindjen tonë, prej dy vitesh PD kaloi një fazë të vështirë sepse ne u ndamë njëherë e përgjithmonë nga e kaluara, korrupsioni dhe non gratat.
Demokratët i bënë zgjedhjet e tyre në kuvendin e 2 Shtatorit. Ata u mblodhën për të ardhmen e PD-së. Ne duhet ta mbyllim dalëngadalë këtë debat të tejzgjatur prej dy vitesh që ka ndodhur brenda PD-së për shkak dhe me pikënisjen me shpalljen non grata të Berishës. Disa nga këta deputetë kanë qëndruar, sot dolën në dritën e diellit për ata që kanë pasur qëllime të tjera, që kanë penguar aksionin opozitar të PD gjatë një viti e pak, që kanë penguar demokratët të marrin pjesë në zgjedhjet e 14 majit duke thurur intriga. “, theksoi Hasa.
Sipas tij, sot dolën në dritë ata që iu thoshin demokratëve që po bëjmë beteja në emrin tuaj por në fund treguan se iu shërbejnë interesave të ‘Trekëndëshit të Bermudës’.
“Për mua kanë zgjedhur rrugën e gabuar. Ata mendonin dikur se kolegët e tyre kishin zgjedhur rrugën e gabuar. Nuk e dinë se cilat janë arsyet por siç duket mali i madh i korrupsionit, kulla e korrupsionit paska pasur një atraksion magnetik për disa. Do të ishte mirë të bashkoheshin me demokratët. Ishin të ftuar të vinin në Kuvendin e tyre kombëtar. Ka plot deputetë që kanë harruar prej muajsh zgjedhësit e tyre, aq më tepër anëtarët e partisë së tyre “, tha Hasa.
Discussion about this post