Nëse ju bie rasti të shkoni në Spitalin e Fierit, në mes të urgjencës dhe maternitetit, brenda dhe jashtë kazanëve të mbetjeve urbane, do të gjeni të hedhura sasi të konsiderueshme mbetjesh spitalore të rrezikshme.
Pak ditë më parë, në një emision investigativ u denoncua se kudo nëpër spital shiheshin me sy të lirë age, shiringa, sende qelqi, sende me gjak dhe risk të lartë.
Por, pavarësisht këtij denoncimi, drejtoresha e spitalit të Fierit, Nevila Shuke, nuk dha shpjegime për situatën. Jemi të bindur se askush nga eprorët e saj, përfshirë ministren Albana Koçiu, nuk i ka kërkuar llogari. Pyetja mbetet: Pse nuk është përmbushur kontrata nga kompania përgjegjëse për pastrimin e mbetjeve të rrezikshme?
E vetmja masë që u mor ishte vendosja e një gjobe rreth 1 milionë lekë të reja, pasi u konstatuan shkelje në procedurën e menaxhimit të mbetjeve. Gjobën e paguan Spitali, edhe pse përgjegjëse ishte kompania “ECO RICIKLIM” e Arbër Teqajt dhe Ervin Meçes.
Fiton sërish pa garë Teqja
Pas këtij denoncimi Shuke, në vend të reflektonte, ka firmosur një tjetër kontratë abuzive me firmën në fjalë.
Më datë 2 shkurt 2024 është publikuar në sistemin e APP kontrata e firmosur për tenderin me objekt ‘Evadimi dhe trajtimi i mbetjeve spitalore’ dhe me vlerë 147 milionë lekë. Në garë për këtë tender kanë qenë vetëm firmat “Eco Riciklim” sh.p.k dhe “Medi-Tel” sh.p.k, por kjo e fundit është skualifikuar për shkak se nuk ka dorëzuar dokumentin e sigurimit të ofertës.
Kur ligji në fakt kërkon që për dokumentet në mungesë operatorët duhet të njoftohen, sidomos në raste si ky, ku ishin vetëm dy oferta. Por, Shuke nuk e ka bërë këtë. Drejtoresha e Spitalit ka vendosur që t’ia falë këtë kontratë firmës së Arbër Teqajt dhe Ervin Meçes. E pra, kjo aferë duhet të jetë kurdisur me miratimin e ministres së Shëndetësisë, Albana Koçiu, ndryshe nuk do të kishte kaq guxim drejtoresha Shuke.
Tenderi ka marrë ‘Flamurin e Kuq’ nga Open Data, sinjal që përveç se na tregon shkeljet në prokurim, jep alarmin edhe për riskun e lartë të korrupsionit. Për më tepër ku risk ndikon në neglizhencën për pastrimin e mbetjeve në Spitalin e Fierit.
Gjendja e rrezikshme që prej 2019
Gjendja aktuale e Spitalit Rajonal të Fierit, ku qytetarët rrezikohen më shumë se sa kurohen, ka nisur qysh në vitin 2019. Ka qenë Kontrolli i Lartë i Shtetit i cili në raportin e Auditimit me temë “Menaxhimi i Mbetjeve Spitalore”, evidentonte pikërisht se stafi mjekësor është i patrajnuar, si dhe spitalet nuk plotësojnë kushtet infrastrukturore për mbledhjen dhe grumbullimin e mbetjeve spitalore. Spitali i Fierit renditej në një nga spitalet ku gjendja për menaxhimin e mbetjeve të rrezikshme ishte shumë keq.
Ndërsa theksonte se janë bërë vazhdimisht tendera nga Spitali për menaxhimin e mbetjeve dhe kontratat nuk janë zbatuar.
Sakaq, në sistemin e prokurimeve rezulton se që nga viti 2019 është firma “Eco Riciklim” sh.p.k ajo që fiton tenderat pa garë për menaxhimin e mbetjeve të rrezikshme. Teqja edhe pse çdo vit rrit kërkesën për fondin, kontratën nuk e zbaton asnjëherë. Jemi sot pas 5 viteve dhe situata vazhdon po njësoj. Madje me papërgjegjshmërinë më të madhe, fill pas marrjes së gjobës Shuke firmos aferën e radhës me dyshen Teqja-Meçe.
Teqja ka qenë i arrestuar në vitin 2015 për falsifikim dhe përvetësim, si një prej përfituesve nga Fondi i Sigurimit të Detyrueshëm të Kujdesit Shëndetësor, në shuma të konsiderueshme parash nëpërmjet skemës së rimbursimit të medikamenteve nëpërmjet farmacisë së tij “Express”.
Teqja u arrestua për evazion fiskal, pasi kishte përfituar në mënyrë abuzive nga fondi i rimbursimit të ilaçeve, nëpërmjet falsifikimit të recetave.
Gjithashtu, rezulton se nëpërmjet kompanisë tjetër të tij DIAL-ALB ai është gjobitur në kohën e pandemisë nga Autoriteti i Konkurrencës me masë administrative gjobë në vlerën e 1.2 milionë lekëve për shumëfishim të çmimeve të dezinfektantëve dhe maskave në muajt kur Shqipëria u kalua nga pandemia e Covid-19, duke zhvatur kështu qytetarët e varfër shqiptarë.
Epo, si mund të lihet një proces kaq i rëndësishëm në duart e një grabitqari të fondeve shtetërore si Teqja. Për këtë duhet të japë shpjegime drejtoresha Shuke, si dhe ministrja Albana Koçiu.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post