Kryeministri i Shqipërisë, Edi Rama është pyetur nga gazetari i VOA se pse hesht për Berishën dhe përcaktimin e tij ‘non-grata’ nga SHBA.
Rama thotë se nuk ka nevojë për koment pasi është fakt në sytë e të gjithë shqiptarëve.
Gjithashtu ai thekson se tashmë Shqipëria ka hyrë në fazë të re dhe nuk ka më monumente të parrëzueshëm të të shkuarës së korrupsionit dhe pengimit të demokracisë.
“Flet vet Sekretari i Shtetit në këtë rast dhe mendoj që çdo prononcim në këtë drejtim do të politizonte edhe më shumë një fakt, i cili nuk ka nevojë për koment, një fakt që është në sytë e gjithë shqiptarëve, jo sot, por prej vitesh e vitesh, një fakt që tregon se Shqipëria ka hyrë në një fazë të re dhe se nuk ka më asnjë monument të parrëzueshëm të të shkuarës së korrupsionit dhe të pengimit të demokracisë.”- u shpreh Rama.
Gjatë intervistës ai gjithashtu është pyetur edhe për ngritjen e Agjencisë për Media dhe Informim dhe shqetësimin që kanë pasur të tjerët për një centralizim, propagandë dhe kontroll të informacionit.
Edi Rama u përgjigj se ky reagim vjen nga mosnjohja dhe moskuptimi, pasi kjo agjenci nuk ka lidhje fare as me kontrollin dhe as me propagandën, por sipas tij, shërben si një ndërveprim me opinionin publik.
“Ky është një reagim që vjen me siguri nga mosnjohja dhe moskuptimi i rolit dhe i misionit të kësaj agjencie. Agjencia është ndërtuar mbi modele të konsoliduara në vende shumë të zhvilluara demokratike. Republika Federale e Gjermanisë e ka identikisht të tillë dhe, në fakt, prej shembullit të saj ne kemi krijuar këtë agjenci. Ata e quajnë Zyra për Mediat dhe Informimin e Qeverisë, ne e kemi Agjencia për Median dhe Informimin pranë Këshillit të Ministrave. Po kështu edhe Italia, po kështu edhe vende të tjera. Dhe kjo agjenci nuk ka lidhje fare as me propagandën as me kontrollin, por ka lidhje me një rritje të kapacitetit të qeverisë për të ndërvepruar me opinionin publik dhe me burimet e informacionit, në mënyrë që të garantojmë që informacioni, që kërkohet nga qeveria, të jetë sa më i shpejtë dhe njëkohësisht sa më integral në funksion të mediave dhe, nga ana tjetër, që qeveria të jetë në vijimësi e informuar dhe natyrisht e vetëdijshme deri në fund për opinionet e qytetarëve, për opinionet e mediave dhe opinionet në mjedisin pluralist shqiptar.”- tha Rama.
Kryeministri Edi Rama ditën e djeshme mbajti fjalimin e tij në Asamblenë e Kombeve të Bashkuara të OKB-së, ku u ndal për të falënderuar të gjithë vendet që ndihmuan Shqipërinë me dozat e vaksinave, duke theksuar se kjo eksperiencë kërkon bashkëpunimin e të gjithëve.
