Emri i përfolur disa ditë më parë si zëvëndësuesja e Vali Bizhgës në krye të kabinetit të Edi Ramës, ka marrë drejtim tjetër. Në mbledhjen e sotme të qeverisë, Vilma Premti është emëruar zëvendësministre për Evropën dhe Punët e Jashtme.
Nuk dihen ende arsyet e ndryshimit të beftë, por Lapsi.al raporton se në korridoret e Kryeministrisë përflitet për një refuzim që Edi Rama i bëri propozimit të Vali Bizhgës për t’i lënë Vilma Premtin në pozicionin e shefes së kabinetit.
Megjithatë për ta shpërblyer Vilmën, mendoi shefja e saj e dikurshme, Elisa Spiropali, e cila e propozoi në qeveri për postin e zëvendësministres për Evropën dhe Punët e Jashtme.
Kujtojmë që më herët Vilma Premti ishte shefe kabineti e Elisa Spiropalit. Më pas shërbeu si shefe kabineti e Holta Zaçajt, kryetares së Gjykatës Kushtetuese.
E tani duket se po rikthehet sërish në oborrin e Elisa Spiropalit te Ministria për Evropën dhe Punët e Jashtme. Dhe siç thonë burimet, Vali Bizhga vijon të jetë ende drejtoreshë kabineti e Edi Ramës.
Discussion about this post