Trajneri i ekipit kombëtar Edi Reja ka analizuar sfidën ndaj Polonisë. Ai theksoi se skuadra dha maksimumin por lojtarët bënë shumë gabime në mesin e fushës. Ndër të tjera trajneri italian përgëzoi tifozët për atmosferën e krijuar.
“Kishim filluar të binim fizikisht në momentin që pësuam golin. Po ulnim ritmin dhe po provoja të bëja zëvendësime për t’i dhënë pak freski skuadrës. Ndoshta duhej ta zëvendësoja Baren pak më shpejt, por ai po këmbëngulte që të qëndronte ende. Më vjen keq për humbjen, pasi bëmë një paraqitje shumë të mirë, ndonëse kishim edhe shumë mungesa.
Së pari dua të falënderoj publikun shqiptar, që ishte i jashtëzakonshëm. Për një publik si ky, ia vlente të provonim deri në fund për të marrë suksesin. Nuk dua të qahem, pasi na mungonin 6-7 lojtarë, por unë kam një grup prej 25 futbollistësh. Sigurisht më vjen keq që mungesat na ndodhën në këtë ndeshje kaq të rëndësishme, megjithatë unë jam krenar me atë që bëmë sot në fushë.
Në të dy ndeshjet kemi gabuar në mbrojtje dhe kemi pësuar gola që nuk duhet t’i marrim më. Pasimi ishte shumë i mirë, por ne duhej të markonim kundërshtarët dhe nuk ishte nevoja të mblidheshim të gjithë në rrezen e portës. Pati disa momente gabimi në rastin e golit, por nuk dua të kritikoj askënd, pasi janë gjëra që ndodhin”, theksoi Reja.
