Ish-zëvendëskryeministrja e Kosovës, Edita Tahiri ka deklaruar sot gjatë një interviste televizive se “Open Balkan” nuk u kijua për të sjellë të mira ekonomike mes vendeve, por është plan i Beogradit për të rikthyer hegjemoninë e saj në rajon.
“Rezultatet ekonomike të shpalosura nuk janë të drejtpërdrejta nga kjo iniciativë, janë iniciativa rajonale të mëparshme, natyrisht disa gjera mund të kenë lëvizur në letër. Por praktikisht, vështirë të mendohet një zbatim i vendimeve të 4 lirive, sepse temat e hapura në Ballkan nuk janë mbyllur. Flitet për Ballkanin e hapur ndërkohë që Kosova e Serbia nuk kanë arritur njohjen reciproke. Shqipëria mund të flasë për kufij por ajo nuk kufizohet me Serbinë, është Kosova ajo që kufizohet. Çështjet gjoja ekonomike, janë thellësisht gjeopolitike”, tha ajo.
Sipas saj, Serbia e ka menduar me detaj çdo gjë dhe kërkon që përmes “Open Balkan, të arrijë Serbinë e Madhe, pasi mund të përfitojë nga rasti që ka tregun më të madh ekonomik në rajon.
Tahiri thotë se së pari ajo kërkon të marrë kontrollin mbi ekonominë e vendeve të Ballkanit, pastaj të sundoj në çdo drejtim. “Serbia ka tregun më të madh në rajon, gjatë luftës nuk ka dëmtuar veten por vendet e tjera të ish- Jugosllavisë, ka avantazh në ekonomi sepse e hapur ndaj Kinës dhe Rusisë, kundër partnerëve perëndimor, po shfrytëzon çdo mënyrë për t’u ngritur në hegjemoni ekonomike dhe nga momenti që po vonon për të qenë e tillë po tenton sërish kartën e Serbisë së Madhe, duke u shndërruar në burim destabiliteti në rajon”, tha ajo. Sipas Tahirit, Rama po bën gabimin më të madh që mbështet planet e Vuçiçit.
Discussion about this post