Aksidentet rrugore në Shqipëri janë një fenomen që mesa duket nuk mjaftojnë për të sensibilizuar jo vetëm qytetarët por edhe autoritetet përkatëse. Dita e sotme ishte tragjike për familjen Gushi ku mbetën të vdekur katër pjesëtarët e saj. Në orën 08:23 në vendin e njohur si “Kripa” në Vlorë u shuajt një familje e tërë. Eduart Gushi 44 vjeç, Silvana Gushi 33 vjeçe si dhe dy fëmijët ishin duke udhëtuar drejt Vlorës për pushime por një Audi A8 që po udhëtonte me një shpejtësi tej normave të lejuara e goditi nga pas makinën ku udhëtonin viktimat. Në Audin e zi udhëtonin Igli Madani 22 vjeç, Fabio Lamaj 21 vjeç dhe Glorian Selimaj 24 vjeç.
Pasi ka goditur me fuqi “Toyota-n”, Audi është përplasur me shtyllën e energjisë elektrike dhe më pas ka dalë nga rruga. Ngjarja solli reagimin e kreut të Shtetit, Ilir Meta si dhe kryetarit të kuvendit, Gramoz Ruçi të cilët kërkuan njëzëri hetimin e shpejtë të ngjarjes dhe vendosjen e drejtësisë për ngjarjen. Një ngjarje e tillë duhet të ishte pasuar nga reagimi shembullor i kryeministrit të vendit që në rastin konkret reklamon punimet 3D të Piramidës dhe nuk kontribon nëpërmjet ligjit për ashpërsimin e kodit rrugor dhe parandalimit të ngjarjeve të tilla që marrin jetë njerëzit.
Referuar analizave të ekspertëve autostradat në Shqipëri ofrojnë shumë pak siguri për shkak të mungesës së theksuar të tabelave paralajmëruese dhe sinjalistikave që garantohen me ligj por në realitet nuk funksionon. Referuar rastit të sotëm, shoferi ishte kapur më parë tre herë në shkelje por i ishte falur pezullimi i patentës teksa rezulton djali i një biznesmeni shumë të pasur. Në Shqipëri ndodh rëndom që ndëshkimet mungojnë për shkak të influencës që disponojnë personat e pasur dhe lidhjeve që kanë me organet kopetente për të mbyllur çështjen.
Mosndëshkueshmëria në këto nivele provokon aksidente që për fat të keq rezultojnë fatale për njerëzit. Ka edhe nga ato raste kur drejtuesit e mjeteve të cilët kapen në shkelje korruptojnë policin duke i shpërblyer me shuma monetare vetëm për të mos u ndëshkuar. Në Shqipëri ligjin e bën i forti dhe viktima konsiderohet gjithmonë si fajtor.
