Kryepolici Gledis Nano mori detyrën me premtimin se do të krijojë një strukturë drejtuese bazuar mbi meritokracinë. Ndoshta në plan mund ta ketë menduar mirë, por në praktikë nuk rezulton se po e zbaton. Një rast tipik është emërimi i Edmond Pjetrit në pozicionin e Shefit të Komisariatit nr.2 në Tiranë.
Pjetri ka qenë më parë shef i Komisariatit të Vlorës, por u pezullua nga ish-Drejtori i Përgjithshëm i Policisë Ardi Veliu, pasi nuk kishte identifikuar një parcelë me rreth 17 mijë rrënjë kanabis në fshatrat e Vlorës.
Një inspektim i kryer me helikopter në Tetor 2020 zbuloi një parcelë të madhe të mbjellë me lëndë narkotike, në një zonë ku ndahet Vlora me Tepelenën.
Pas këtij operacioni, Policia e Shtetit vendosi të pezullojë shefin e komisariatit Vlorë, Edmond Pjetrin, ndërkohë që dërgoi për ndjekje penale dy zyrtarë të tjerë.
Pak javë më pas, Pjetri rikthehet sërish në detyrë, por kësaj radhe në një pozicion shumë më të ulët. Ai transferohet si oficer rendi në Komisariatin e Durrësit, pozicion në të cilin qëndroi deri në Nëntor të vitit 2021.
Pas emërimit të Gledis Nanos në krye të Policisë së Shtetit, i ndriti sërish fati edhe Edmond Pjetrit.
Ai siguron firmën e shefit të tij të madhe për të drejtuar Komisariatin nr.2 në Tiranë, mesa duket në shenjë mirënjohje për shoqërinë që kanë pasur të dy, kur kanë ushtruar detyrat në Vlorë, në vitet 2011-2012.
Pra, “merita” kryesore e Edmond Pjetrit është shoqëria që ka me Gledis Nanon.
Dhe, kjo miqësi, duket se ka thyer edhe “barrierat” administrative e disiplinore, duke emëruar një ish-të pezulluar për mungesë lufte kundër hashashit, në krye të një prej komisariateve më të rëndësishme të Tiranës dhe të të gjithë Shqipërisë.
Discussion about this post