Deputeti i PD, Edmond Spaho, deklaroi ditën e sotme se, “Foltorja” e Sali Berishës është gjëja më e mirë që i ka ndodhur PD-së. Spaho tha se, PD kishte rënë në gjumë dhe kishte nevojë për një shkundje. Sipas tij, strukturat e partisë nuk kishin më shpresë për fitore, prandaj duhet motiv.
“Kam përgjegjësitë e mia për gjendjen në të cilën ndodhet sot Partia Demokratike dhe për këtë arsye nuk kam pranuar post as në Kuvend dhe as në parti. Më janë ofruar dy poste dhe i kam refuzuar. Do të jap kontributin tim si deputet i thjeshtë. Nëse unë kam bërë gabime në të shkuarën, kjo nuk do të thotë se tani nuk duhet të ngre zërin dhe të kërkoj që ai që ka humbur 4 herë radhazi, të japë dorëheqjen. Sepse nuk ka më asnjë pritshmëri dhe strukturat e PD-së e kanë humbur besimin te fitorja tashmë”, tha ai.
Këtu ai theksoi se vetëm Sali Berisha mund t’i rikthente PD energjinë që po humbiste dhe se së shpejti PD do jetë më e fortë se më parë. “Mund të them që Foltorja është gjëja më e mirë që i ka ndodhur PD-së, të paktën që nga viti 1997. E ka shkundur partinë. Strukturat e partisë janë në depresion politik. Vetëm Sali Berisha mund ta bënte këtë shkundje dhe për këtë duhet t’i jemi mirënjohës. Ai mund ta ketë nisur për interesa personale, por kjo i shërben shumë PD-së”, deklaroi Spaho.
Deputeti demokrat shtoi se ka ngelur shumë i ofenduar nga fjala “llum” dhe se nuk e pranon as në nivel personal dhe as në nivel partiak.
