Ditën e sotme prokurori Edvin Kondili depozitoi kërkesën dhe shprehu interesin për të qenë drejtuesi i Prokurorisë së Posaçme kundër Korrupsionit dhe Krimit të Organizuar. Deri tani ka shkuar në dy numri i kandidatëve.
Kondili ka qenë prokuror i Krimeve të Rënda dhe e kaloi me sukses Vettingun në 7 qershor të vitit 2019. Prokurori që hetoi trafikun e 613 kilogramë kokainë që u kapën në një kontenier me banane në portin e Durrësit, rezultoi se nuk kishte probleme me pasurinë, pastërtinë e figurës apo aftësitë profesionale.
Kondili ka qenë edhe një nga tre kandidatët në garën e parë për kreun e SPAK-ut, ku garoi me drejtuesin aktual Arben Kraja dhe prokurorin Altin Dumani. Asokohe ai ishte i vetmi që nuk kishte mbajtur asnjëherë poste drejtuese në organin e akuzës.
Kujtojmë se disa ditë më parë, interesin për të drejtuar Prokurorinë e Posaçme kundër Korrupsionit dhe Krimit të Organizuar e shprehu edhe prokurori Adnan Xholi.
Xholi ka një karrierë mbi 20-vjeçare në prokurori. Qysh prej vitit 2013 ai punon në Prokurorinë e Përgjithshme dhe është konfirmuar nga Vettingu vitin e kaluar. Adnan Xholi ka qenë edhe kandidat për të marrë drejtimin e Byrosë Kombëtare të Hetimit (BKH), mirëpo nuk i rezultoi fitues. Drejtuesi aktual, Arben Kraja përfundon mandatin në datën 18 dhjetor dhe si detyrim Këshilli duhet të hapë 3 muaj përpara garën.
Discussion about this post