Është pezulluar nga detyra dhe po ndiqet penalisht efektivi i policisë që shtyu drejt greminës një operator dhe gazetaren Anila Hoxha pasditen e së shtunës në Dajt.
Lajmin e ka bërë të ditur ministri i Brendshëm Bledi Çuçi, i cili njofton në Facebook se pas ngjarjes Drejtori i Policisë së Shtetit dhe drejtori i SHÇBA kanë komunikuar menjëherë me gazetaren.
“Lidhur me incidentin e ndodhur një ditë më parë me gazetaren Anila Hoxha, dua t’ju informoj se efektivi i policisë është larguar nga detyra. Drejtori i Policisë së Shtetit dhe drejtori i SHÇBA kanë komunikuar menjëherë me gazetaren, si dhe në bazë të kallëzimit të saj efektivi do të ndiqet penalisht”, shprehet Çuçi.
Ministri Çuçi i ka kërkuar ndjesë Hoxhës, ndërsa njofton se nuk do të ketë tolerancë ndaj këtyre incidenteve të shëmtuara.
“I kërkoj ndjesë dhe e falënderoj znj. Hoxha, si dhe iu bëj thirrje gjithë qytetarëve që ndeshen me efektivë të tillë policie të mos heshtin, por t’i denoncojnë. I garantoj se toleranca për këto shfaqje të shëmtuara si ajo e një dite më parë do të jetë zero. Gjej gjithashtu rastin t’u bëj thirrje efektivëve të Policisë së Shtetit të mos ia lejojnë vetes të bien në këtë nivel, që i përjashton ata automatikisht nga radhët e uniformave blu”, tha ministri.
Incidenti ndodhi të shtunën në Qafë Mollë, kur gazetarët po ndiqnin nga afër operacionin për nxjerrjen e trupit të biznesmenit Ruzhdi Hoxha, kur efektivi i policisë ka shtyrë drejt greminës gazetaren dhe operatorin.
Discussion about this post