Janë zbardhur detaje nga dosja hetimore e policisë në veprimet e Jeton Lamit, efektivit të operacionales që u vu në pranga një ditë më parë pasi akuzohet se ka ndihmuar të arratiset i shumëkërkuari Ervis Martianj. Në një raportim nga Gjykata e Kurbinit, ku Lami pritet që të njihet sot me masën e sigurisë, gazetarja Klodiana Lala thotë se efektivi e ka shoqëruar me një automjet “Audi A8’, Ervis Martinajn mbrëmjen e 5 gushtit. Sipas gazetares, dyshja shihen rreth orës 21:15 duke hyrë në hotel me një vajzë.
Te nesërmen, sipas gazetares Lala, efektivi Lami ka ardhur dhe ka marrë Martinajn e vajzën që e shoqëronte. Bashkë me një tjetër person që nuk është identifikuar ende, ata janë larguar nga hoteli.
“Ata rezultojnë të jenë nisur nga Peza në drejtim të Durrësit në datën 5 gusht në orën 21:15 shihen duke hyrë në hotel. Sipas të dhënave paraprake dhe pamjeve filmike rezulton se Ervis Martinaj dhe vajza që e shoqëronte kanë dalë të nesërmen dhe janë shoqëruar nga oficeri dhe një person tjetër që nuk është identifikuar ende. Edhe vajza që e shoqëronte është marrë në pyetje. Pamjet e fundit të Ervis Martinaj janë në Tiranë më 7 gusht dhe më pas nuk dihet asgjë për të. Sipas familjes ai ka humbur kontaktet më datë 9 gusht,” tha Lala.
Këto janë pikërisht pamjet e fundit që tregojnë të gjallë Martinajn, pasi pas kësaj lëvizjeje, biznesmeni i lojërave të fatit ka humbur gjurmët. Jeton Lami, agjenti i Forcave Operacionale do të dalë ditën e sotme përballë Gjykatës. 28-vjeçari dyshohet se ka ndihmuar të shumëkërkuarin Ervis Martinajn, të arratisej. Dyshohet se ai e ka transportuar me makinë disa herë nga Lezha në Laç apo në Shkodër gjatë kohës që ai ka qenë në kërkim, pas zhvillimit të operacionit “Plumbi i artë”./News24
Discussion about this post