Policia ka dhënë detaje lidhur më ngjarjen që ndodhi ditën e djeshme, kur efektivi Rrok Frroku ra në humnerë gjatë një operacioni. Sipas policisë, ngjarja ka ndodhur rreth orës 12:00, në një zonë malore të fshatit Shosh, Dukagjin. Ku gjatë kontrollit në terren, në kuadër të planit të masave për kontrollin e territorit, për goditjen e veprimtarisë kriminale të kultivimit të bimëve narkotike, njëri nga efektivët e grupit të kontrollit, konkretisht Nënkomisar Rrok Frroku , 54 vjeç, si pasojë e terrenit mjaft të thepisur, është rrëzuar dhe ka rënë në humnerë.
Për shkak të terrenit të vështirë, kolegët që i erdhën në ndihmë kanë mundur të nxjerrin Frrokun nga humnera vetëm pas 12 orësh që ai kishte ngecur aty.
Ekipi i urgjencës mjekësore i ka dhënë ndihmën e pare oficerit të Policisë dhe po e mban nën monitorim, së bashku me shërbimet policore, deri në mbërritjen e helikopterit, pasi transportimi i mëtejshëm për në Tiranë është vonuar për shkak të terrenit.
Nga pika fundore e rrugës që shkon automjeti deri në vendin ku aktualisht ndodhet punonjësi i Policisë i dëmtuar, është 6 orë me këmbë dhe një terren shumë i vështirë që e bën të pamundur transportimin me krahë, të punonjësit të Policisë. Sakaq, bëhet me dije se ai ka marrë dëmtime të shumta në këmbë dhe në pjesë të tjera të trupit, por ndodhet jashtë rrezikut për jetën.
Discussion about this post