Egnatia ka barazuar 1-1 ndaj Aarhusit në një ndeshje të luftuar, ku nuk munguan emocionet dhe episodet e forta.
Takimi nisi në mënyrë dramatike për danezët, të cilët mbetën me 10 lojtarë që në minutën e 3-të, pas kartonit të kuq të Eric Kahl.
Skuadra shqiptare shfrytëzoi avantazhin numerik dhe kaloi në epërsi në minutën e 13-të me Ildi Grudën, i cili realizoi një gol mjaft të bukur.
Egnatia pati mundësi të tjera për të rrezikuar portën kundërshtare, por nuk arriti të dyfishonte rezultatin.
Në fundin e pjesës së parë, Altin Kryeziu provoi të shënonte, por portieri Jesper Hansen reagoi saktë.
Pjesa e dytë nisi me një tjetër ritëm, teksa Aarhusi u hodh në kërkim të barazimit.
Në minutën e 49-të, James Bogere ndëshkoi mbrojtjen e Egnatias me një parabël të zgjuar, duke vendosur shifrat në 1-1.
Pas golit, danezët administruan mirë topin, ndërsa Egnatia u përpoq të gjente hapësira për të rikthyer avantazhin.
Trajneri Nevil Dede ndërhyri disa herë me zëvendësime, duke freskuar repartet e skuadrës rrogozhinase.
Në minutat e fundit, të dyja ekipet kërkuan mundësinë për golin e fitores, por pa sukses.
Arbitri sinjalizoi përfundimin e takimit pas katër minutave shtesë, me rezultatin që mbeti i pandryshuar.
Egnatia nuk arriti të shfrytëzonte epërsinë numerike për gati gjithë ndeshjen, ndërsa Aarhusi tregoi karakter duke rikuperuar disavantazhin.
Discussion about this post